ASIA – Nagpanawagan ang United Nations’ Food and Agriculture Organization (FAO) nga doblehon ang pagtinguha sa tagsa ka rehiyon sa pagpakig-away sa pagdamo sang mga kaso sang avian influenza sa bug-os nga Asia-Pacific Region.
Suno kay Kachen Wongsathapornchai, regional manager sang Food and Agriculture Organization Emergency Center for Transboundary Animal Diseases (ECTAD), nga sugod sang ulihi nga bahin sang 2023, naobserbahan sang talatapan ang pagtaas sang mga kaso sang virus nga nagalapta sa bag-o nga mga specie sang sapat.
Ginpahayag man sini nga ang pag-utwas sang mga bag-o nga A/H5N1 nga mga strain, nga mas madali nga mapasa, nagapadugang sang pamahog sang pandemya, rason nga kinahanglan ang madasig kag koordinado nga mga tikang sa pagtapna sang amo nga balatian.
Ang bird flu nagalapta sa mga sapat nga ginasagod gikan sa wild nga mga pispis.
Santo sa data sang talatapan, ang H5N1 nga sahi sang avian flu naglapnag sa bug-os nga kalibutan sang nagligad nga mga tinuig, nga nagpatay sang binilyon ka mga pispis nga ginasagod kag wild kag naglapta sa napulo ka mga species sang mammals.
Na-rekord naman sang Australia ang isa ka kaso sang H5N1 sa tawo sang Mayo. Sang temprano sini nga tuig, isa ka Intsik nga babayi ang napatay gikan sa isa ka talagsahon nga H3N8 subtype sang avian influenza, nga ginkabig nga labing-una nga kamatayon sa kalibutan gikan sa strain.
Nahibaluan nga ang Australia, ang may yara sang indi magnubo sa 10 ka mga poultry sang manok ang natapikan, ang naga-atubang sang tatlo ka magkaanggid nga outbreaks sang bird flu.
