MANILA – Ginalauman nga magataas pa ang kaso sang leptospirosis sa masunod nga mga inadlaw bangud ang mabaskog nga ulan dala sang Bagyo Carina kag ang enhanced Southwest Monsoon (Habagat) nagresulta sa tuman nga pagbaha sa pila ka bahin sang Luzon.
Suno kay Health Secretary Ted Herbosa, lima tubtob 14 ka adlaw ang incubation period sang leptospirosis, gani mahimo nga magsugod na sa pagtaas ang mga kaso sa masunod nga semana.
Ang mga kaso suno sa tiglikom ang magadugang sa masunod nga semana kag sa amo nga tion, magabutang ang ahensya sang leptospirosis lane.
Nagpaathag man ini nga ang mas importante sa pagbutang sang mga leptospirosis lane sa mga pasilidad sa pag-atipan sa ikaayong lawas, amo ang pagpalapnag sang impormasyon kon paano makilala, ma-diagnose, kag mabulong ang balatian.
Nahibaluan nga ang leptospirosis isa ka impeksyon gikan sa bakterya nga gikan sang mga ihi kag higko sang sapat kaangay sang mga ilaga.
Ang natapikan nga ihi sang sapat pareho sang mga ilaga mahimo magsamo sa tubig baha sa tion sang mabaskog nga ulan, kag mahimo magsulod sa lawas sang tawo ilabi na sa nagatabok sa baha.
Ang mga sintoma sini nagalakip sang hilanat, pagsuka, pagsakit sang muscles, kag pagsakit sang ulo.
Sa iban nga mga kaso, naga-eksperyensya man sang tuhay nga kasakit sa mga maskulo sang tiil kag mapulapula nga mga mata, samtang ang mga malala nga kaso mahimo nga may jaundice (mapula-pula nga pagbag-o sang duag sang lawas), maitom nga duag sang ihi, light-colored nga higko, mahinay nga pagguwa sang ihi, kag malala nga sakit sang ulo.
As of July 13, may kabug-usan nga 1,258 ka kaso sang leptospirosis ang narekord sa pungsod subong nga tuig, sa diin 133 ang napatay.
Ang mga masunod nga rehiyon ang may pagdugang sa kaso sang leptospirosis humalin Hunyo 2-Hulyo 13: Zamboanga Peninsula, Caraga, Soccsksargen, Western Visayas, Mimaropa, Eastern Visayas, kag Northern Mindanao.
