JANIUAY, ILOILO – Nagalaum si Janiuay, Iloilo Mayor Paulino “Paul” Parian nga may yara man sang solusyon nga bulig ang mga Sangguninang Bayan Members may kaangtanan sa delayed nga sweldo sang mga empleyado sang Janiuay Local Government Unit (LGU).
Halin sa alkalde pakadto sa job hires ang apektado sang atrasado nga sweldo sa amo nga banwa bangud sang pag-expire sang appointment sa ila nga officer-in-charge treasurer nga si Emily Delos Santos sang nagligad pa nga Hulyo 2.
Sa interview sang Bombo Radyo sa alkalde, iya ginpahayag nga antes paman nga nag-expire ang appointment ni Delos Santos, kada semana, gina-remind sini ang treasurer sang iya nga appointment.
Suno kay Parian, ginpasaka man sini sa salary grade 18 halin sa salary grade 11 ang sweldo ni Delos Santos bangud kapin duha ka dekada naman ini nga nagaserbisyo sa banwa kag
tuyo sini nga mangin full pledged treasurer sang ila lokal nga panguluhan.
Nagdepensa man ini sa mga huring-huring nga wala niya ginrekomenda ang treasurer bangud makatatlo sini ka beses nga ginrekomenda ukon gin-endorso ang papeles ni Delos Santos.
Ginalantaw man sini nga posible wala nagpakig-angot si Delos santos sa Human Resource rason nga nag-expire ang appointment sini.
Sa subong, yara na sa central office ang papeles ni Delos Santos kag ginaproseso.
Gin-athag man sang natungdan nga indi siya ang rason sang delayed nga proseso sang papeles ni Delos Santos bangud wala man ini nakaagi sa iya opisina.
Nahibaluan nga bulan sangb Abril sang nag-abot ang reminder ni Delos Santos, kon sa diin, liwat sini nga gin-remind ang treasurer apang nalab-otan sang expiration sang Hulyo.
