ILOILO – Padayon nga agresibo ang kampanya sang Iloilo Provincial Health Office (IPHO) batok sa dengue kasunod sang posibilidad nga magataas ang kaso sang balatian sa masunod nga bulan.
Sa interview sang Bombo Radyo kay Dr. Rodney Labis, Chief sang Health Service Delivery Division sang Iloilo Provincial Health Office, iya ginpahayag nga tayuyon ang ila nga koordinasyon sa mga kabanwahanan sa probinsya agud sekyaron ang dengue response activities nga ginapatuman.
Suno kay Labis, naghatag naman ang talatapan sang mga supplies nga ginagamit sang mga sentro kag Local Government Unit (LGU) sa tagsa ka dengue response activity.
Ginpahayag man sini nga sa pagpadulong sang bukas-klase, nagkoordinar man sila sa Department of Education – Division of Iloilo agud nga isulod ang kampanya kontra sa dengue sa ila nga Brigada Eskwela subong nga semana.
Tinutuyo man sang tikang nga malikawan ang dengue sa eskwelahan kasunod sang pagbukas sang klase sa masunod nga semana.
Naghingyo man ini sa publiko nga magkoordinar agud nga indi na magtaas pa ang kaso sang dengue sa Iloilo.
