PARIS, FRANCE – Ginpasigurado sang host country nga France nga safe kag strikto nga ginapatuman sang gobyerno ang peace and order samtang nagapadayon ang 2024 Paris Olympics.
Sa interview sang Bombo Radyo kay Bombo Ramil Isogon, Bombo International Correspondent sa France, iya ginpahayag nga madamo sang nabasa kagapon nga adlaw bangud man sa pagtupa sang ulan kadungan sa pagbukas sang Olympics 2024.
Suno kay Isogon, apisar sini, yara sa gihapon ang presensya sang otoridad, kon sa diin, nag-augment sang mga police officers sa pila ka bahin sang Paris agud nga masiguro nga wala sang terrorist attack nga matabo samtang nagapatigayon sang nagkalain-lain nga hinampang.
Ginpahayag man sini nga may yara sang 45,000 ka mga kapulisan ang ginpang-deploy agud nga mabantayan ang mga athletes kag mga turista.
Sa bahin naman sang armadong kusog sang pungdsod, may yara sang 18,000 ka mga aktibo nga military ang nagalibot kag naga-monitor sa kahiwatan.
Mas ginpasangkad naman ang pagbantay sa dalagan sang trapiko bangud may yara sang kapin 20,000 ka mga auxiliaries ang naka-standby sa nagkalain-lain nga dalan.
Ginpatuman naman ang pila ka road closure, kon sa diin, gina-abisohan ang publiko nga likawan na lang nga magdala sang salakyan kon magtambong sa kahiwatan.
May yara naman sang available nga bisekleta agud nga mahimo magamit sang mga natamad nga maglakat samtang nagalibot sa syudad.
