ILOILO – Wala na sang plano pa si Iloilo City Mayor Jerry Treñas nga magsulat pa sa iban nga airlines para sa dugang nga direct international flight sa Iloilo Airport.
Ini kasunod sang pag-grant sang Cebu Pacific sang sulat sang alkalde nga ibalik ang international flights halin sa Hongkong to Iloilo vice versa.
Sa interview sang Bombo Radyo kay Mayor Treñas, iya ginpahayag nga kinahanglan anay nga padakuon ang passenger terminal sang airport kag dugangan ang pasilidad antes magdugang sang bag-o nga mga international flights.
Suno kay Treñas, kinahanglan nga unahon anay ang improvement sang Iloilo National Airport antes nga dugangan ang mga flights bangud masami nga may mga problema nga ginareklamo sa paluparan.
Dako man ang pagpasalamat sini sa Cebu Pacific sa pag-grant sang iya sulat bangud nga natigayon na ini natuman matapos ang apat ka tuig nga wala sang international flights sa amo nga paluparan.
Nagpanawagan man ang natungdan sa Bureau of Customs (BOC) nga dapat nakahanda ang ahensya sang ila dugang nga mga personnel agud indi na makatuga sang delay.
Ginalantaw man sang alkalde nga mas madamo pa ang mga turista nga magapadulong sa syudad kag sa probinsya sang Iloilo kasunod sang pagbalik sang international flights.
Ginalauman man ni Mayor Treñas nga magaserbi ini sang mas masangkad nga access para sa Iloilo.
Nagapati man siya nga sa subong, supisyente kag masarangan nga mahatag sang Cebu Pacific nga international flights bangud kon dugangan pa ang flights, posible indi masarangan sang airport.
