MANILA – Naglab-ot sa 3,628,500 ka mga indibidwal sa masobra 3,000 ka mga barangay ang apektado sang kabug-usan nga epekto sang Southwest Monsoon (Habagat), subong man sang Tropical Cyclones Carina kag Butchoy.
Base sa pinakaulihi nga situational report sang National Disaster Risk Reduction and Management Council (NDRRMC), kalabanan sa mga residente nga apektado ang naghalin sa Central Luzon nga may 2,134,938, ginsundan sang Bangsamo nga may 552,971, Soccsksargen nga may 260,767, kag Ilocos Region nga may 24,286.
May yara sang 168,933 ka mga indibidwal ukon 42,673 ka mga pamilya ang nagpabilin sa 1,025 ka mga evacuation centers, samtang 900,421 ka mga tawo ukon 217,389 ka mga pamilya ang nagapangita sang temporaryo nga pasilungan sa iban nga lugar.
Tuhoy sa mga casualties, ang National Disaster Risk Reduction and Management Council nagsiling nga 28 ka tawo ang ginreport nga napatay—sa diin 10 ang na-validate na, kag 18 ang yara pa sa validation.
Apang ginpahayag sang Philippine National Police (PNP) nga as of Friday, naglab-ot na sa 34 ang fatalities.
Ginpahayag sang National Disaster Risk Reduction and Management Council nga naka-record man sang P212,002,653 nga balor sang kahalitan ang Department of Agriculture nga nag-apekto sa 12,456 ka mga mangunguma kag mangingisda.
Naka-log man sang P6.5 million nga kahalitan ang National Irrigation Administration sa Mimaropa kag Soccsksargen.
Sa pihak nga bahin, nagsaka sa P171,662,374 ang kahalitan sa imprastraktura.
May yara sang 720 ka mga balay nga apektado bangud sang mabaskog nga ulan kag pagbaha—-sa diin 556 ka mga balay ang partially damaged, samtang 164 naman ang totally damaged.
Nobentay-otso ka mga dalan kag siyam ka mga taytay ang nagpabilin man nga indi maagyan sa bug-os nga pungsod.
May 105 ka mga syudad kag munisipyo nga nagdeklarar man sang state of calamity.
Ginpahayag sang National Disaster Risk Reduction and Management Council nga may kabug-usan nga P145,325,654 nga balor sang bulig ang nahatag sa mga indibidwal nga ginhalitan sang bagyo.
