BATAAN – Natalana nga magkuha sang sample ang Bureau of Fisheries and Aquatic Resources (BFAR) sang mga isda sa mga lugar nga apektado sang oil spill gikan sa naglugdang nga MT Terra Nova sa baybayon sang Bataan agud mahibaluan kon may kinahanglanon nga magdeklarar sang pagdumili sa pagpangisda.
Ginpahayag man ni Bureau of Fisheries and Aquatic Resources spokesperson Nazario Briguera nga posible maapektuhan ang palangabuhian sang linibo ka mga mangingisda kun temporaryo nga dumilian sila sa pagpangisda bangud sa oil spill.
Suno kay Environment Secretary Maria Antonia Yulo-Loyzaga, posible makaapekto ang oil spill sa Bulacan, Cavite, kag Pampanga.
Sugod sang Sabado, ginlaragway sang Philippine Coast Guard (PCG) ang oil spill nga 12 tubtob 14 kilometros ang kalabaon apang “manageable” gihapon.
Ang mga technical divers sang Harbor Star, ang salvor nga gin-arkilahan sa pagtrabaho sa M/T Terra Nova, bisan pa, nakatukib sang isa ka gamay nga pagtulo nga naghalin sa valve sang tangke.
Suno kay Briguera, gina-engganyo sang Bureau of Fisheries and Aquatic Resources ang mga mangingisda nga bantayan ang ila palibot agud mahibaluan kun nagalapta na ang oil spill sa ila lugar.
Sa pihak sini, ginpahayag ni Briguera nga nakahanda ang gobyerno nga magbulig sa mga mangingisda nga maapektuhan sang posible fishing ban.
Ang MT Terra Nova nga padulong kuntani sa Iloilo ang may dala nga 1.4 million ka litro sang industrial fuel sang nagkulob ini sa kalayuon nga 3.6 nautical miles east off Lamao Point sa banwa sang Limay sa Bataan.
Suno sa Philippine Coast Guard (PCG), 16 sa 17 ka mga tripulante ang na-rescue, samtang isa ka crewman ang nasapwan nga patay.
Sang Sabado, ginmando ni Presidente Ferdinand “Bongbong” Marcos Jr ang pagtukod sang isa ka inter-agency task force nga maga-address sa oil spill.
