𝗜𝗟𝗢𝗜𝗟𝗢 𝗖𝗜𝗧𝗬 — Nag-request ang Fort San Pedro National High School sang dugang nga mga manunudlo agud nga matatapan ang mga estudyante sang amo nga buluthuan.
Sa interview sang Bombo Radyo kay Melanie Tabaculde, Principal III sang Fort San Pedro National High School, iya ginpahayag nga sa pagbukas sang school year 2024-2025, nagdoble ang numero sang mga estudyante sa ila nga buluthuan ilabi na sa Technical-Vocational-Livelihood Track (TVL) – Automotive Strand sa Senior High School.
Suno kay Tabaculde, may mga estudyante nga personal ginpili ang amo nga strand bangud tuyo nila nga tubtob Grade 12 lang sila nga mag-eskwela.
Ginpahayag man sini nga bangud nga may mga section nga gintunga, nagakinahanglan man sila sang dugang nga manunudlo, kon sa diin, ginapreparahan naman sang Division Offices.
Gin-athag man sang natungdan nga indi overload ang mga manunudlo kag ma-cater nila ang tagsa ka section nga ila ginakaptan.
Ginalantaw man sang principal nga isa ka factor sa pagdamo sang mga estudyante amo ang mga residente nga naghalin sa pila ka probinsya nga nagpadulong sa syudad kag temporaryo nga nagapuyo.
Nahibaluan nga nangin kontrobersyal ang 81 ka mga estudyante nga yara sa isa ka section sang Senior High School program sang amo nga buluthuan nga yara sa idalom sang Technical-Vocational-Livelihood Track (TVL) Industrial Arts Strand.
