Ginsita si Former presidential spokesperson Harry Roque sang mga senador kadungan sang pagtambong sini sa Senate investigation kaangot sa gin-raid nga Philippine Offshore Gaming Operators (POGO) hubs sa Luzon.
Nagtambong si Roque sa imbestigasyon apisar nga una na ini nga nagpadala sang sulat nga indi ini makatambong sa hearing sang Senate Committee on Women, Children, Family Relations, and Gender Equality nga ginapamunuan ni Sen. Risa Hontiveros.
Gin-imbitaran si Roque nga magtambong sa Senate inquiry matapos gintumod ni Philippine Amusement Gaming Corporation chairman Alejandro Tengco nga ini ang utok sa pagbulig agud makakuha sang lisyensya ang Lucky South 99, ang bag-o lang gin-raid nga POGO firm sa Porac, Pampanga.
Apang sa pag-atubang sini sa imbestigasyon, nagsaligbat ini samtang nagapamangkot pa si Sen. Hontiveros.
Gin-akigan naman ni Sen. Sherwin Gatchalian si Roque kag ginpaandaman nga i-contempt sa tion nga padayunon sini ang pagsaligbat kay Sen. Hontiveros.
Sa ulihi, nagpangayo man sang pasaylo si Roque sa iya ginhimo.
