Nagdangat sa P4.56-billion ang ginpain nga confidential and intelligence fund para sa Office of the President sa idalom sang ginaduso nga P6.35 trillion nga 2025 national budget.
Pareho ini nga balor sa nakuha sang amo man nga opisina sang 2023 kag 2024.
Base sa mga dokumento nga gin-release sang Department of Budget and Management (DBM) partikular sang Budget of Expenditures and Sources of Financing for Fiscal Year 2025, nakasaad nga ang opisina ni President Ferdinand Marcos, Jr. ang nakakuha sang P2.310-billion intelligence fund kag P2.250 billion para sa confidential expenses.
Sang 2021, sang tion ni anay President Rodrigo Duterte, naghingyo ang Office of the President sang tag-P2.250 billion kada isa para sa confidential kag intelligence funds.
Wala naman sang confidential funds para sa Office of the Vice President para sa 2025 bangud wala man ini sang gin-request nga secret expenditures para sa amo nga tuig.
Kun matandaan sang nagligad nga tuig, nangin sentro sang kontrobersiya ang confidential funds ni Vice President Sara Duterte kag mangin sang ginapamunuan sini anay nga Department of Education (DepEd).
Mas nagtunog ini sang nadiskubrehan nga naggasto sang OVP ang P125 million nga secret funds sa sulod sang 11 ka adlaw sang 2022.
Ini nga kontrobersiya — nga nagsugod man sang sunod-sunod na nga word war kag indi-paghangpanay sa administration alliance —ang nagtapos man sang dalayon na nga ginbasura sang Kamara sang request sini nga P650 million nga confidential funds para sa 2024.
Kun basehan ang 2015 joint circular, ang confidential expenses ang nagapatuhoy sa surveillance activities sa civilian government agencies, samtang ang intelligence expenses naman amo ang para sa intel information-gathering activities sang uniformed kag military personnel nga may “direct impact” sa national security.
Mabudlay i-audit ang confidential and intelligence funds bangud exempted ini sa standard procedures sang Commission on Audit (COA).
