ILOILO CITY- Nagsungka na sa otoridad ang driver sang motorsiklo nga naka-hit and run sa isa ka bata sa atubang sang Palmares Building, Brgy. Magsaysay Village, La Paz, Iloilo City.
Ang biktima amo ang lima ka tuig nga bata nga lalaki nga padayon subong nga ginabulong sa ospital.
Ang nagsungka nga driver amo si alyas Raffy, 35, residente sang Bgry. Rizal, Oton, Iloilo.
Sa interview sang Bombo Radyo kay Police Corporal June Oliver Diaz, traffic investigator sang La Paz Police Station, iya ginpahayag nga ginsiling sang driver nga wala niya matalupangdan ang bata nga nagatabok sa dalan rason nga disgrasya niya ini nga nabungguan.
Suno kay Diaz, ginpahayag sang driver nga bangud sa kahadlok, nagdiretso ini kag sang ulihi, nagpadulong ini sa mga opisyal sa Nabitasan, La Paz agud ipatigayon ang iya pagsungka sa otoridad.
Wala man sang plano ang pamilya sang bata nga magpasaka sang kaso sa driver.
Nagpasalig naman ini nga siya ang masalo sang gasto sa ospital.
