Ginpanagtag sang Iloilo provincial government ang P1 million nga financial aid sa 43 local government units halin sa disaster risk reduction and management fund.
Ini nga pondo ang paga-gamiton sa pagpahagan-hagan sang epekto sang El Niño phenomenon kag agud nga suportahan ang Project 1-43 (1 Province, 43 City/Municipalities) para sa Tanum Iloilo nga isa ka tree growing activity.
Sa interview sang Bombo Radyo kay retired Police Colonel Cornelio Salinas, head sang Provincial Disaster Risk Reduction and Management Office (PDRRMO), iya ginpahayag nga nakabaton man ang local government units sang communication devices kag portable generating systems agud nga ma-promote ang renewable energy concept.
Ang banwa sang San Enrique amo ang nakabaton sang P1.5 million aid para sa pagbakal sang disaster tools kag equipment samtang ang Tigbauan naman ang may yara sang P5 million para sa pagtukod sang Civil Defense Operations Hub (Resilience Hub).
Suno kay Salinas, kabahin ini sang tikang sang provincial government agud nga mapa-capacitate ang local government units kun pagahambalan ang disaster response kag management.
Ginpasalamatan man sang opisyal ang partisipasyon sang mga banwa sa summit nga suno sa iya nagapakita sang akto sang pag-isa kag mataas nga lebel sang kolaborasyon sa tunga sang municipal disaster risk reduction and management offices.
Ini nga 1st Provincial DRRM Summit ang ginpatigayon sa Pototan Astrodome kahapon, Hulyo 31.
(via Balita Halin sa Kapitolyo)
