𝗜𝗡𝗗𝗜𝗔 —Nagapadayon ang rescue operation sa estado sang India sa nabagatnan sang Kerala pagkatapos sang mabaskog nga ulan nga nagtuga sang makamamatay nga landslides nga nagtupa sa mga puluy-an kag nag-stranded sang ginatos ka mga tawo.
Nagsobra sa 150 ang kadamuon sang mga napatay, madamo sa ila ang nalumos, kag pagdugang sang kadamuon sang mga casualties ang ginalauman nga magataas pagkatapos sang indi magkubos sa duha ka landslides nga nag-igo sa naaminhan-sidlangan nga distrito sang estado sang Wayanad sang kaagahon sang Martes.
Naga-atubang sa karon ang mga rescue workers sang makahaladlok nga mga kahimtangan bangud sang mabaskog nga ulan, kakulang sang kuryente, naguba nga mga taytay kag mga dalan nga ginbalabagan sang natumba nga mga kahoy samtang ginatinguhaan nga malab-ot ang mga nakalampuwas kag mahibaluan ang bug-os nga kasangkaron sang kalamidad.
Ang mga emergency responders naman sa lugar sang landslides – nga natabunan sang lunang kag natumba nga mga kahoy – nagdala sang mga bangkay sa mga trapal kag nagbulig sa mga pumuluyo nga magsaylo sa safe nga lugar samtang nagabubo ang ulan.
Suno sa southern command sang Indian Army, naglab-ot sa 1,000 ka mga tawo ang naluwas tubtob subong.
Santo sa weather report, ang lapnagon nga pag-ulan ang may kabug-usan nga 150 mm sa bug-os nga Kerala, nga ang pila ka mga lugar naka-elsperyensya sang halos 250 mm nga ulan sa sulod sang 24-oras.
Nahibaluan nga ang mabaskog nga pagbaha kag landslides ang nagpatay sang ginatos, nagpahalin sang minilyon kag nagguba sang imprastraktura sa bug-os nga Bagatnan nga Asya sang nagligad nga mga binulan.
Samtang ang mga baha kinaandan sa rehiyon sa tion sang tig-ululan, ang mga siyentipiko nagasiling nga ang krisis sa klima, amo ang nagpalala sang mga hitabo sa panahon.
