𝗜𝗟𝗢𝗜𝗟𝗢 —Ginsaysay sang tag-iya sang bugasan sa Brgy. Baldoza, Lapaz, Iloilo City, kon sa diin gintiro-patay ang anay punong barangay sang Brgy. Ingore, Lapaz, Iloilo City.
Ang biktima amo si Ernie Poral, 65-anyos, residente sang nasambit nga lugar.
Sa interview sang Bombo Radyo kay Alyas Nene, tag-iya sang bugasan, iya ginpahayag nga ang biktima ang nag-park sang iya salakyan kag nagpadulong sa iya nga balaligyaan, kon sa diin, nagbakal ini sang walo ka kilo nga bubod.
Suno kay Salido, naglahoganay pa sila sang biktima samtang ini ang nagabakal, apang, dugay-dugay, may nagpalapit nga lalaki kag gulpiyada nga nagpalupok sang iya pusil rason nga gilayon nga natumba ang biktima.
Ginpahayag man ni Salido nga nagtuyo pa ang biktima nga tawgon ang iya asawa nga nagbakal sang isda, apang wala pa nakontento ang suspek, kon sa diin, nagbalik ini kag ginpasundan pagid sang ika-duha nga pagpaniro.
Ginpatpat man sang natungdan nga nagatakilid ang biktima sang ini ang gintiro sang suspek.
Gintumod man ni Salido nga subong lang gid nga tinion nga aga nga nagbakal ang biktima bangud masami ini nga nagabakal sang bubod sa iya.
Gintudlo man sini nga matapos gintiro sang suspek ang biktima, nagbalik ini sa parkingan kag nagpadulong sa bahin sang Brgy. Ticud, Lapaz palusot sa coastal road.
