𝗜𝗟𝗢𝗜𝗟𝗢 𝗖𝗜𝗧𝗬— Naglab-ot sa 480 ka mga modernized jeepney ang nagpakigbahin sa ginpatigayon nga ‘transport break’ sang pila ka mga kooperatiba sa Iloilo City agud magprotesta sa ginaduso sang gobyerno nga pauntaton ang Public Utility Vehicle Modernization Program (PUVMP).
Ini kasunod sang 22 ka mga senador ang nagpirma sang Senate Resolution 1096 nga nagahingyo sa gobyerno nga temporaryo nga pauntaton ang implementasyon sang PUVMP, ukon ang Public Transport Modernization Program (PTMP).
Sa interview sang Bombo Radyo kay Mr. Halley Alcarde, General Manager sang Western Visayas Transport Cooperative (WVTC), iya ginpahayag nga halos katorse ka mga kooperatiba ang nagpartisipar sa kahiwatan agud nga ipanawagan sa gobyerno nga padayunon ang modernisasyon sa pungsod.
Suno kay Alcarde, ang tanan mga transport cooperatives sa syudad ang nagdala sang ila modernized jeep kag nagplastar sa magtimbang nga bahin sang diversion road.
Ginpahayag man sini nga nagsugod ang kahiwatan sang alas-1:00 tubtob alas-3:00 sang hapon,kon sa diin, naglawig sang kapin duha ka oras.
Nahibaluan nga sa bug-os nga Western Visayas, may yara sang 95 ka units ang sa idalum sang Western Visayas Transport Cooperative, kon sa diin, naglab-ot sa P200 million ang ila nangin utang agud mabakal ang mga modern jeepneys.
Una na nga ginpahayag sang kooperatiba nga masakit ini para sa ila bangud ang gobyerno man nagtulod sa ila sa modernisasyon, apang gobyerno man mismo ang magalaglag sa ila sa ulihi.
