ILOILO CITY-May duha na ka mga testigo nga ginauyatan ang La Paz Police Station may kaangtanan sa pagluthang-patay kay former Ingore, La Paz Punong Barangay Ernie Poral sang Agosto 5 sa Baldoza, La Paz, Iloilo City.
Sa interview sang Bombo Radyo kay Police Captain Marlon Perez, hepe sang La Paz Police Station, iya ginpahayag nga ang isa ka testigo amo ang anak mismo ni Poral.
Suno kay Perez, nakit-an mismo sang anak ni Poral malapit sa ila balay ang suspek nga si Nilo Guardaya, 39, residente sang Igcocolo, Guimbal, Iloilo.
Ginpahayag nga sang amo nga tion, nagapanilag na ang anak ni Poral bangud may ideya na ini nga yara sang naga-monitor sa hulag sang iya amay.
Suno kay Perez, base sa panaysayon sang anak ni Poral, nakit-an niya ang suspek nga nagbakal sang sigarilyo sa tiangge kag wala ini sang suksok nga helmet gani natandaan niya ang nawong sini nga nagsanto gid sa itsura ni Guardaya.
Gindugang ni Perez nga ang isa pa testigo amo ang tricycle driver sa terminal sa Baldoza, La Paz.
Suno sa hepe, base sa panaysayon sang tricycle driver, antes ang pagpangluthang, nakit-an niya si Guardaya nga nag-park sang iya motorsiklo terminal kun sa diin ginkakas sini ang iya helmet kag nag-inom sang tubig rason nga nakit-an niya ang nawong sang suspek.
Makaligad ang pila oras, didto na natabo ang pagluthang kay Poral kag sang ginpakita ang kuha sang cctv sa pagtiro sa biktima, ang ginasuksok sang gunman amo man ang ginasuksok sang lalaki nga nakit-an sang testigo sa terminal kag mangin ang nawong sini ang pareho gid.
Sa karon, tatlo ka mga motibo ang ginasundan sang kapulisan may kaangtanan sa pagluthang-patay kay Poral.
Ini ang ginalakpan sang negosyo apang wala pa ma-specify kun ano ini, amo man ang iya pagka-punong barangay, kag personal nga mahimo may nakaaway ini.
