Pormal na nga nakig-alyansa ang political base sang Villar Family nga Nacionalista Party sa partido ni President Ferdinand Marcos Jr. nga amo ang Partido Federal ng Pilipinas (PFP).
Nagpanguna si Marcos sa ceremonial signing sang alliance agreement sa tunga sang duha ka nasambit nga mga partido sa Taguig subong nga adlaw, Agusto 8.
Sa iya speech, ginpahayag sang presidente nga kabahin pa ini sang unity kag preparasyon man para sa palaabuton nga midterm elections.
“We are continuing to answer the call for unity and this is what I always explain to people. This is, of course, this is in preparation for the midterm elections,” suno sa presidente.
Ginbalikan man sini ang tion nga myembro siya sang Nacionalista kun sa diin iya gin-ako nga indi siya mangin presidente kun wala ang bulig sang amo nga partido.
Bangud sini, nagpanawagan man ini sa mga myembro sang duha ka partido nga suportahan ang mga kandidato sa upcoming elections nga handa nga ipaiway ang partisan kag personal nga indi paghangpanay sa pulitika.
“[This is to ensure that the candidates] that will win next year are the leaders that understand that we must put our partisan or personal differences aside,” suno diri. “Ang pinaka mahalaga ay magkasundo tayo kung ano man ang pinakamaganda para matulungan natin ang ating mga kababayan.”
“President Marcos has proven that by the impressive accomplishments of his administration in the short time that it has been in power,” pahayag naman ni former Senate president kag Nacionalista Party chairman Manny Villar. “That is why we welcomed the President’s announcement that the Partido Federal ng Pilipinas will seek alliances with the country’s national political parties in order to forge a common vision for the country.”
Nahibaluan nga madalom ang relasyon ni Marcos sa Nacionalista Party kag mga Villar nga isa sa pinakamanggaranon nga pamilya sa pungsod.
Sang 2010, nagdalagan si Marcos sa pagka-senador sa idalom sang Nacionalista Party kun sa diin si Manny Villar ang standard bearer.
Sang 2016, nagpa-eleher liwat si Marcos bilang independent matapos nga wala siya gin-endorso sang Nacionalista kag ang duha pa ka party members nga sanday anay senador Alan Peter Cayetano kag Antonio Trillanes IV nga pareho nagpadalagan sa pagka-bise presidente.
Naghalin si Marcos sa Nacionalista Party kag nagsaylo sa banner sang Partido Federal sa 2022 elections apang sang ulihi ginsuportahan siya sang mga Villar.
Naestablisar ang Nacionalista Party sang 1907 kag amo ang oldest party sa Pilipinas kag puluy-an sang pila ka Philippine presidents lakip si Ferdinand E. Marcos.
Magluwas sa Nacionalista Party, nagpirma man anay ang Partido Federal sang alliance agreements kaupod sa Lakas-CMD, Nationalist People’s Coalition, kag National Unity Party.
