Nagapati ang iloy sang biktima sang pagpangluthang sa Villa Anita, Iloilo City Proper sang Marso 2024 nga ang nagtiro-patay kay Punong Barangay Ernie Poral sang nagligad nga Lunes amo man ang gunman nga nagpatay sa iya anak.
Kaangot ini sa insidente sang nagligad nga Marso 17, 2024 sang gab-i kun sa diin ang biktima amo si Reniel Lazaro, 30, nga sang amo nga tion, nagapungko lang sa guwa sang tiyangge apang hinali nga may nag-abot nga tawo kag ginluthang siya sa dughan, idalom nga porsyon sang likod, kag sa likod sang iya paa.
Gilayon nga nagpalagyo ang suspek nga sang amo nga tion nagasuksok sang jacket, naka-bonnet, kag may face mask nga green.
Sa pagpatay naman kay Poral sang nagligad nga adlaw, naka-helmet ang suspek apang pagkagab-i, gindakop si Nilo Guardaya, 39, sa Barangay Girado‑Magsaysay, Guimbal kag amo ang gindeklarar sang kapulisan nga suspek sa krimen.
Sa interview naman sang Bombo Radyo kay Alias Bebe, iloy ni Reniel, iya ginpahayag nga nakit-an niya ang katapusan nga portion sang closed circuit television footage kun sa diin nakit-an ang suspek sa pagtiro kay Poral.
Pamilyar sa iloy ang suspek bangud nagakiang-kiang ini suno sa iya pareho man sa nakita niya sa tiil sang nag-atras ang suspek nga nagtiro anay sa iya anak.
Suno kay Alias Bebe, na-file na nila ang kaso sang Abril apang nagapadayon pa subong ang hearings kag wala man nagatambong ang ginaalegar nga suspek.
Ginpahayag sini nga ang nagaatubang lang sa iya amo ang ginaalegar nga lookout sang natabo ang krimen.
“Madamo gid nga salamat sa nagbulig sa pagdakop sa iya. Mahatagan na sang hustisya ang kamatayon sang bata ko,”pahayag sang iloy nga nagatumod kay Guardaya.
Nahibaluan nga yara subong sa Lapaz Police station si Guardaya kag nagapangatubang sang tatlo ka mga kaso lakip ang murder, iligal nga paggamit sang armas-luthang, kag paglapas sa RA 9165 ukon Comprehensive Dangerous Drugs Act of 2002.
Una na nga ginpahayag sang pamilya Poral nga nagapati sila nga ginsugo lang ang ginaalegar suspek bangud indi man nila ini kilala.#
