Nagahingyo ang Police Regional Office (PRO) 6 sang dugang nga pondo para sa Regional Anti-Cybercrime Unit (RACU) agud nga mapasangkad pa ang ila nga operasyon ilabi na subong nga mas abanse naman ang teknolohiya nga ginagamit sang mga suspek sa paghimo sang mga krimen.
Suno kay Police Brigadier General Jack Wanky, regional police director sang Western Visayas, apisar mahapos man para sa pulis nga ma-trace ang simple nga mga krimen kaangay sang scams, may iban nga pagpanghangkat nga ginaatubang ang law enforcers nga ma-crack down ang iban nga sistema sang mga suspek nga nagagamit sang advanced technologies.
Pahayag ni Wanky, paagi sa dugang nga budget, mapauswag pa ang kapasidad sang RACU kag masolusyunan ini nga kakulangan sang mas madasig kag mas epektibo.
Gin-engganyo man sini ang publiko nga mag-report gilayon sa otoridad pananglitan may nahibaluan nga cybercrime incidents.
Nahibaluan nga sa latest data sang opisina, may 218 ka mga insidente nga na-rekord sa first half subong nga tuig nga may 80 incidents ukon 26.8 percent nga pagnubo ipaanggid sa 298 incidents nga na-report sa amo man nga period sang nagligad nga tuig.
Sandig sa sini nga data, ang 10 sa nagapanguna nga cybercrimes sa rehiyon amo ang swindling/estafa (online scams); illegal access sa computer systems; online libel; ATM/credit card fraud; grave threats; computer related identity theft; unjust vexation; grave coercion; photo and video voyeurism; kag fraudulent access devices.
