Pareho nga nakuhaan sang iligal ang duha ka mga lalaki nga nadakpan sa separado nga roving kag checkpoint operations sa Janiuay, Iloilo.
Ang una amo si alias Ryan, residente sang Barangay Damoong sa amo nga banwa nga ginpapundo sang mga pulis sa Crispin Salazar South (Poblacion) matapos nakit-an nga nagalabaw ang ginasukbit sini nga kutsilyo.
Sa interview sang Bombo Radyo kay Police Captain Alwin Salmon, hepe sang Janiuay Municipal Police Station, iya ginpahayag nga sang gin-check na ang lalaki, nakumpiskar pa gid ang isa ka sachet sang suspected shabu nga nagabalor sang ginabanta P1,200.
Sang ulihi, nahibaluan sa record nga isa ini ka Tokhang surrenderer.
Samtang padayon ang inventory sang pulis, ginparahan ang isa pa gid ka motorsiklo nga naglabay bangud wala ini sang headlight kag magahod ang tambutso.
Ang nagadala sang motorsiklo amo si alias Santi, 29, residente sang Barangay Balanac sa amo nga banwa, nga wala man sang mapakita nga nagakaigu nga papeles.
Suno sa hepe, nakuha pa gid sa possession sang suspek ang ginapahayag tatlo ka gramos sang ginapasuni shabu nga nagabalor sang ginabanta P20,400.
Base sa impormasyon sang otoridad, nagagamit man ini sang iligal nga droga.
Mangatubang ang mga suspek sang kaso nga paglapas sa Republic Act 9165 ukon Comprehensive Dangerous Drugs Act of 2002.
