𝗚𝗘𝗥𝗠𝗔𝗡𝗬 —Narumpag ang isa ka hotel sa Moselle Wine Valley, Germany nga nagpatay sang duha ka tawo, samtang ang mga rescuers ang nagatrabaho sang madali sa pagkuha sang isa ka na-trap nga bisita.
Suno kay rescue operation chief Joerg Teusch, nakuha ang bangkay sang isa ka babaye apang wala pa malab-ot sang mga emergency responders ang bangkay sang ikaduha nga biktima.
Anum ka tawo ang naluwas sa sulod sang amo nga adlaw sa isa ka komplikado nga operasyon samtang ang duha ka panalgan ang indi malig-on pagkatapos nga ang ibabaw nga panalgan sini ang narusdak.
Nagsiling naman ang mga prosecutors nga ang hotel gintukod sang ika-17 nga siglo kag ginkay-o sang dekada 80.
Lakip sa mga naluwas amo ang duha ka tuig nga bata, nga wala napilasan, kag ang mga ginikanan sang bata, kon sa diin, ang mga rescuers naka-establisar sang kontak sa sulod sang isa ka gab-i.
Sa subong, indi pa maathag ang gintunaan sang pagkarumpag sang amo nga imprastraktura.
Nagapati ang mga imbestigador nga 14 ka tawo ang yara sa hotel sang nagrumpag ang ibabaw nga panalgan, lima sa ila ang nakapalagyo nga wala sang pilas.
Ginpahayag man sang pulis nga 21 ka tawo sa mga puluy-an malapit sa hotel ang kinahanglan nga i-evacuate bangud man sa natabo nga insidente.
