𝗙𝗟𝗢𝗥𝗜𝗗𝗔, 𝗨𝗦𝗔 — Nagbilin sang lima ka patay kag nagresulta sa ginabanta nga mga ginatos ka libo nga pagkautod sang kuryente ang Bagyong Debby, nga nag-umpisa laslas sa Florida bilang Category-One nga bagyo.
Madasig nga hangin kag mabaskog nga ulan sang Debby ang nagdala sang madamo nga pagbaha sa Florida kag Georgia.
Bangud diri, may mga report man sang pagkaguba sa imprastruktura kag mga puluy-an.
Mataspos ang paglaslas sang Hurricane Debby, madamo nga mga negosyo kag mga non-profit nga organisasyon ang nag-organisar sang mga relief efforts agud buligan ang mga apektado.
Si Gobernador Ron DeSantis sang Florida nagbisita sa Taylor County Middle School sa Perry, Florida, kun sa diin gin-deploy sang estado ang mga resources para sa mga biktima sang bagyo.
Nalakip man ang mga Filipino-Americans sa mga naapektuhan sang Debby sa Tampa Bay area.
Suno kay Rona Lyn, residente sang Valrico, Florida, may mataas nga pagbaha sa palibot sang iya balay tungod sa mabaskog nga ulan.
Bilang nagapuyo malapit sa Alafia River, gin-obserbahan ni Rona Lyn ang madasig nga pagtaas sang lebel sang tubig samtang ang bagyo nagapadayon sa pag-ulan sa lugar.
Ginpahayag niya nga ang pagbukas sang duha ka lokal nga reservoir, ang posible nagpadugang sa pagbaha.
Nahibaluan nga ang Bagyong Debby amo ang ika-lima nga gin-ngalanan nga bagyo sa 2024 Atlantic Hurricane Season.
