Nagpaguwa na sang official statement ang Office of the Campus Administrator sang West Visayas State University (WVSU) Calinog Campus kun sa diin hugot sini nga ginpanginwala nga may nagakatabo nga recruitment kag insurgency sa amo nga eskwelahan.
Ini matapos nalakip ini sa mga educational institution nga gin-claim ni Philippine National Police (PNP) Directorate for Operations Colonel Randy Arceo nga nangin recruitment grounds sang Communist Party of the Philippines – New People’s Army (CPP-NPA). Matandaan nga ginsapubliko ini kadungan sang Committee on Public Order and Dangerous Drugs sa Senado sang Martes, Agusto 6.
Suno kay Dr. Rosario Clarabel Contreras, committed ang ila campus sa paghatag sang dekalidad nga edukasyon kag isa ka safe environment para sa pagpasangkad sang kaalam. Vigilante man ang security team suno sa iya kag tuigan ang pag-conduct sang Air Force Reserve Officers’ Training Corps (ROTC) sang security awareness programs kaangot sa insurgent recruitment.
Ginpahayag sini nga nag-conduct sila sang internal investigation kag wala sang nakit-an nga ebidensya sang recruitment sang mga rebelde.
“Upon learning of these issues, we conducted a thorough internal investigation and found no evidence of CPP-NPA recruitment or insurgency. Our strict policies ensure all campus activities align with our educational mission,” kabahin sang statement.
Nagpanawagan man ang administrator sa publiko nga i-verify gid ang mga impormasyon kag siguruhon nga halin sa masaligan nga sources bangud ang unverified claims ang makahalit sa educational institutions kag sa buwas damlag sang mga kabataan.
“WVSU Calinog Campus remains committed to a safe, inclusive learning environment and will fully cooperate with law enforcement to ensure campus security,” dugang sa statement. “We stand firm against any form of insurgency and unlawful activities and appreciate our community’s support in upholding the truth and protecting our institution’s integrity.”
BACKTRACKING
Nagapatigayon naman ang Philippine Army sang backtracking sa rekord kun may recruitment gid man sang New People’s Army sa WVSU Calinog.
Sa interview sang Bombo Radyo kay Lt. Col. J-Jay Javines, spokesperson sang 3rd Infantry Battalion sang Philippine Army, iya ginpahayag nga bangud yara ini sa rekord sang PNP nga gina-alegar may recruitment activities halin sang 2014, gina-check ini sang militar paagi sa koordinasyon mismo sa pulis.
Nagapakig-angot man ang Philippine Army sa school administration.
Wala sini partikular nga gin-mensyonar ang WVSU – Calinog Campus, apang ginsiling ni Javines nga matuod gid man nga may nagakatabo nga recruitment sang rebelde nga grupo sa mga state university sa pungsod.
Mangin sa mga unibersidad sa Panay suno sa iya, may mga estudyante nga nagaupod sa rebelde kag iban sa ila ang napatay pa sa engkwentro batok sa gobyerno.
Sa tunga sini, mas ginapasangkad gid sang militar ang awareness campaign para mapataas pa gid ang ihibalo sang publiko batok sa mga rebelde.#
(Photo: WVSU Calinog)
