𝗖𝗔𝗟𝗜𝗡𝗢𝗚, 𝗜𝗟𝗢𝗜𝗟𝗢 —Yara na sa punerarya ang mga bangkay sang rebelde nga napatay sa tunga sang engkwentro sang Philippine Army kag Communist Terrorist Group – New People’s Army (CTG-NPA) sa Brgy. Aglonok, Calinog, Iloilo.
Sa interview sang Bombo Radyo kay Lieutenant Colonel J-jay Javines, Chief sang Division Public Affairs Office sang 3rd Infantry Division sang Philippine Army, iya ginpahayag nga may ginakaptan na sila nga mga pangalan sang rebelde apang sa subong, indi pa nila matumod bangud wala sang kompirmasyon halin sa ila nga mga pamilya.
Suno kay Javines, matapos nga natigayon nga ma-lift sang chopper ang mga bangkay sang rebelde, ginkuha ini gilayon sang puneraryo agud nga didto na lang i-claim sang ila nga mga himata.
Ginpahayag man sini nga ginabanta nga naga-edad 40 pataas ang mga rebelde napatay sang engkwentro, kon sa diin, ginakabig man nga mga high profile.
Nahibaluan nga kahapon nga adlaw, gintunghuwaan sang katapo sang gobyerno nga kuhaon ang mga bangkay sa kabukiran apang bangud sa malain nga tyempo, wala nadayon ang operasyon.
Sa subong, nagapakig-angot na ang 12 Infantry Division sang Philippine Army sa pamilya sang mga rebelde agud nga makuha ang ila nga mga bangkay sa punerarya kag mahatagan sang nagakaigo nga paglubong.
Una na nga nagpanawagan ang natungdan sa mga rebelde nga magbalik serbisyo sa gobyerno bangud may mga bulig nga intanyag agud makaumpisa sa bag-o nga pangabuhian.
