𝗝𝗔𝗡𝗜𝗨𝗔𝗬, 𝗜𝗟𝗢𝗜𝗟𝗢 — Patay ang isa ka lalaki matapos nga nakuryente samtang nagakay-o ini sang linya sang kuryente sa balay sang iya nga tiyo sa Brgy. Jibolo, Janiuay, Iloilo.
Ang biktima amo si Roniel Olisa Cantal, 25-anyos, Philippine Air Force Reservist, kag residente sang nasambit nga lugar.
Sa interview sang Bombo Radyo Iloilo kay Police Captain Alwin Salmon, hepe sang Janiuay Municipal Police Station, iya ginpahayag nga gintuyo sang biktima nga kay-uhon ang kuryente sa balay sang iya nga tiyo, kon sa diin, wala sini natalupangdan nga natandog sini ang live wire nga linya sang kuryente.
Suno kay Salmon, ginhingagaw pa sang amay sang biktima nga ipalayo ang live wire sa anak niya, apang tuman na ka ulihi, bangud gilayon ini nga nagpilit sa kuryente.
Ini ang nangin rason man kon ngaa gilayon nga ginbawian ini sang kabuhi.
Ginhingagaw pa nga dal-on sa Janiuay District Hospital ang natungdan apang gindeklara nga dead-on-arrival (DOA) sang doctor.
Ginpahayag man sang natungdan nga manogsulod na kontani sa Philippine Air Force ang biktima sa masunod nga semana, apang natabo ang insidente.
Kasunod sang hitabo, nagpaguwa sang opisyal nga statement ang Philippine Air Force (PAF) – Reserve Officer Training (ROTC) sang West Visayas State University – Janiuay Campus sang pagpakighunong sa pamilya kag mga himata sang biktima.
