𝗝𝗔𝗡𝗜𝗨𝗔𝗬, 𝗜𝗟𝗢𝗜𝗟𝗢 — Halos 90-porsyento sa mga tanom sa Iloilo City ang nakalampuwas sa halit nga dala sang El Niño Phenomenon sang nagligad nga summer season.
Sa interview sang Bombo Radyo kay Engineer Niel Ravena, head sang Iloilo City General Services Office, iya ginpahayag nga sa pagsulod sang tig-ululan, napuno sang rainwater ang harvesting facility sang talatapan sa Lapaz nga nangin dako nga bulig para sa plaza nga area.
Suno kay Ravena, sa subong, dira nagakuha ang talatapan sang inogbunyag nga tubig para sa mga tanom sa syudad.
Ginpahayag man sini nga tanan nga tanom sang syudad ang naumpawan na sa halit nga gindala sang El Niño nga ginakabig man sang talatapan nga isa ka good development.
Gintumod man sang natungdan nga nagapadayon ang rehabilitation sa mga city street landscapes kon sa diin, may mga tanom man nga ginaislan agud nga mangin resilient sa tyempo.
Nahibaluan nga naglab-ot sa 40 tubtob 50- porsyento sang mga tanom sa syudad ang nagkala-laya bangud sa tuman ka init nga tyempo.
