𝗖𝗔𝗟𝗜𝗡𝗢𝗚, 𝗜𝗟𝗢𝗜𝗟𝗢 — Nagapabilin sa gihapon nga unidentified ang lima ka mga rebelde nga napatay sa tunga sang engkwentro sang Philippine Army kag Communist Terrorist Group – New People’s Army (CTG-NPA) sa Brgy. Aglonok, Calinog, Iloilo.
Sa interview sang Bombo Radyo kay Lt. Col. Vicel Jan Garsuta, commander sang 12th Infantry Battalion, iya ginpahayag nga indi pa nila mapaguwa ang pangalan bangud ginahulat pa nila ang opoisyal nga kompirmasyon halin sa mga pamilya sang napatay nga rebelde.
Suno kay Garsuta, sa lima ka mga rebelde, duha ang na-identified nga naghalin sa Antique samtang ang duha naman ang naghalin sa Iloilo kag ang isa sa may bahin sang Capiz.
Ginpahayag man sini nga makabig ang mga rebelde nga high profile individual, apang padayon pa nga ginapadalman agud nga matumod ang ila posisyon sa idalom sang ila aktibo nga grupo.
Nagpasalig man ang natungdan nga gina-assist sang Philippine Army ang tagsa ka pamilya sang mga rebelde agud nga makapadulong sa punerarya kag makuha ang ila himata.
Kun balikan, nagsugod ang engkwentro sang nagapatigayon sang pagpatrolya ang mga katapo sang gobyerno sa nasambit nga lugar kag gulpi lang sila nga may nabatian nga paglupok gikan sa katapo sang Communist Terrorist Group – New People’s Army rason nga nag-retaliate ang mga army.
Bangud man sa amo nga engkwentro, wala nakalampuwas ang isa ka army nga masamaran, apang sa subong yara na ini sa hilway nga sitwasyon.
