Balantayan ang music A-listers sa closing ceremony sang Paris Olympics 2024 nga natalana ‘las tres sa kaagahon sa Lunes (oras sa Pilipinas).
Isa diri amo ang 27-anyos nga Filipino-American singer nga si Gabriella Sarmiento Wilson ukon kilala nga si H.E.R. nga amo ang magakanta sang national anthem sang Estados Unidos sang Amerika sa Stade de France bilang kabahin sang handover para sa Los Angeles Summer Games sa 2028.
Tumandok si H.E.R. sang California, isa ka five-time Grammy winner, may ginauyatan man nga Emmy kag Oscar awards sa iya decorated career, kag popular man sa iya 2021 protest anthem nga ” I Can’t Breathe.”
Lakip man sa ginabati-bati nga maga-perform sa seremonya amo sanday Billie Eilish, ang Red Hot Chili Peppers kag Snoop Dogg nga yara na nga daan sa Paris bilang torch bearer, commentator, kag regular spectator sa hinampang.
Ang Hollywood actor nga si Tom Cruise ang may yara man sang pre-recorded nga motorcycle kag skydiving stunt bilang parte sang handover portion samtang ang French bands nga Phoenix kag Air ang maga-perform sa ceremony proper.
Matandaan nga sa opening ceremony sa sini nga hinampang, lakip sa imbitado sa seremonya sa River Seine amo ang music icons nga sanday Lady Gaga kag Celine Dion.
Ini ang ikatlo nga tion nga nag-host ang Paris sang Olympics kasunod sang 1900 kag 1924 kag ang 2028 amo man ang pangatlo nga tion nga maga-host ang Los Angeles kasunod sang 1932 kag 1984.
