𝗖𝗔𝗟𝗜𝗡𝗢𝗚, 𝗜𝗟𝗢𝗜𝗟𝗢 —Nagpaathag ang Philippine Army nga parte sang ila documentation ang pagkuha sang litrato sa rebelde nga napatay sa engkwentro sa Brgy. Aglonok, Calinog, Iloilo.
Ini kasunod man sang pagpakamalaut sang anak sang nalakip sa napatay nga ginapahayag rebelde nga si Aurelio Berjes Bosque, 57-anyos, alyas Boy, residente sang Barangay Carvasana, Calinog, Iloilo.
Sa interview sang Bombo Radyo kay Lieutenant Colonel J-jay Javines, spokesperson sang 3rd Infantry Division, Philippine Army, iya ginpahayag nga ang tuyo lamang sang katapo sang gobyerno amo ang maghatag sang bulig paagi sa mga local government unit sang banwa.
Suno kay Javines, parte sang dokumentasyon ang pagkuha sang litrato sa mga pamilya nga naga-claim sang mga bangkay sa punerarya.
Gin-athag man sini nga para lang gid sa documentation purposes ang ila ginaubra.
Una na nga nagpabutyag si Bryan Bosque nga nagkahangawa ang ila pamilya sa gin-ubra nga pagpangkuha sang litrato sa ila nga wala sang ila nga pahanugot.
Nahibaluan nga sa subong, duha na lang ka mga rebelde ang nabilin sa punerarya kag ginahulat na lang nga kuhaon sang ila nga mga pamilya.
