𝗜𝗟𝗢𝗜𝗟𝗢 —Naglab-ot na sa 20 ka mga indibidwal ang na-record sang Department of Health (DOH) Western Visayas nga napatay bangud sa dengue.
Sa interview sang Bombo Radyo kay Dr. Bea Camille Natalaray, program medical coordinator for emerging and re-emerging infectious disease cluster sang DOH 6, iya ginpahayag nga ini ang 114% nga mas mataas kon ikumpara sa kapareho nga period sang tinalikdan nga tuig.
Suno kay Natalaray, na-record ang mga datus sa morbidity week 31 sugod sang Hulyo 28 tubtob Agosto 3, 2024, kon sa diin nabalhag ang 1,743 nga mga bag-o nga kaso sang dengue.
Ginpahayag man sini nga ang may pinakamataas nga kaso sang mga dengue nga na-record sa rehiyon, amo ang sa probinsya sang Iloilo nga may yara sang 3,914.
Ginasundan man ini sang probinsya sang Negros Occidental nga may yara sang 1,584 cases, samtang ang Aklan naman ang may 1,319 nga kaso sang mga dengue.
Nahibaluan nga sa kabug-usan nga 20 ka mga napatay, anom diri ang naghalin sa Iloilo kag anom man ang naggikan sa Negros Occidental.
Kalabanan naman sang mga natapikan sang balatian amo ang mga kabataan nga naga-edad isa tubtob pulo ka tuig.
