𝗣𝗔𝗦𝗦𝗜 𝗖𝗜𝗧𝗬 —Ginpasigurado sang pamunuan sang Passi City ang publiko nga magamit ang pagdeklara sang ‘state of calamity’ ilabi na sa procurement process sang mga kinahanglanon sa pagtapna sang dengue cases.
Sa interview sang Bombo Radyo kay Passi City Mayor Stephen Palmares, iya ginpahayag nga sang nagligad nga Byernes, nagpatawag siya sang city council meeting agud nga madiskusyonan ang ginpasa nga report sang Passi City Disaster Risk Reduction and Management Office (CDRMMO) nga mga kaso sang dengue sa lugar.
Suno kay Palmares, ginaprayoridad na sang syudad ang pagbakal sang bulong kag mga kagamitan agud magamit kontra sa mga lamok.
Ginpahayag man sini nga tuyo sang pagdeklara sang state of calamity, amo agud nga mapadasig ang hulag sang syudad sa mga kinahanglanon sa pagtapna sang dengue lakip na diri ang pag-procure sang mga kinahanglanon.
Gin-athag man sang alkalde nga sa pagdeklarar sang amo nga estado, mahimo mag-angkon sang ‘police power’ ang syudad, kon sa diin, mahimo nga maka-force entry ang local nga pamunan sa mga pribado nga duta agud nga malimpyohan ini.
Nagpasalig man ang natungdan nga suportado sang syudad ang mga pasyente nga naka-confine sa ospital, lakip ang financial assistance kag ang supply sang dugo kon kinahanglanon.
Nagpahayag man si Palmares nga wala sang bayaran sa ospital, kon sa diin, may naka-standby man nga anom ka mga ambulansya agud magsugat-dul-ong sa mga pasyente.
Nahibaluan nga sa 51 ka mga barangay, yara sa 45 diri ang may record sang dengue cases kag sa subong yara na sa kabug-usan nga 353 ka mga indibidwal ang na-dengue.
Isa naman ang ginapahayag napatay, apang indi pa mapat-od bangud, sa subong wala pa sang napasa nga death certificate sa pamunuan sang Passi City.
