Wala nagpa-areglo ang motorcycle rider nga nabalian sang tul-an sa paa matapos nabungguan sang modernized jeep nga nag-U-turn sa Brgy. Concepcion, City Proper sang nagligad nga adlaw.
Ang biktima amo si alias Nonoy, 32, nga halin sang direksyon sang Parola wharf kag padulong kuntani sa Muelle Loney sang natabo ang insidente.
Sa interview sang Bombo Radyo kay Police Corporal Emmanuel Jude Garcesa, imbestigador sa kaso, iya ginpahayag nga base sa istorya sang driver, nag-overtake siya sa traditional jeep nga iya ginasundan bangud maligwa man ang dalan.
Ginpahayag nga naga-park ang modernized jeep sa higad sang karsada apang hinali lang nga nag-U-turn pakadto sa direksyon sang Parola Wharf kag wala man nag-signal rason nga nagluntad ang aksidente.
Kun basehan naman ang driver sang modernized jeep, ma-U-turn kuntani ini sang nakit-an nga nagapadulong ang motorsiklo rason nga nagpreno ini apang nalab-ot gid sang motor ang iya nga bumper.
Sa interview naman sang Bombo Radyo kay Nonoy, ginpahayag sini nga indi matuod nga siya ang nakabunggo sa modernized jeep kag makapamatuod diri ang eyewitnesses suno sa iya nga nagabasol man sa modernized unit.
Naghingyo man ang biktima nga bayaran sang driver ang gasto sini sa pagpaospital amo man ang adlaw-adlaw nga galastuhon sang iya pamilya bangud apektado man ang iya palangabuhian matapos ang insidente.#
