𝗟𝗘𝗢𝗡, 𝗜𝗟𝗢𝗜𝗟𝗢—Nagpaathag ang driver sang jeep nga natumba kag nag-utas sang duha ka kabuhi sang mga pasahero sa Barangay Cagay, Leon, Iloilo.
Ang mga napatay amo sanday Arvin Cabana, 14, kag ang hinablos sini nga si Princess Cabana, 6 ka tuig.
Ang driver naman amo si Yuben Cabansag, 41, lunsay mga residente sang nasambit nga lugar.
Sa interview sang Bombo Radyo kay Cabansag, driver sang jeep, iya ginpahayag nga gintuyo sini nga magbutang sang kalso sa mga royda sang jeep, apang bangud sa madanlog kag malutak ang alagyan, nalapaw ang royda rason nga gilayon ini natumba.
Suno kay Cabansag, ginalikawan niya lamang kontani nga madisgrasya ang iya sakay nga mga pasahero bangud halos tanan diri ang mga estudyante.
Ginpahayag man sini nga ginsapar niya nga malikaw sa disgrasya ang iya pasahero, apang wala na sini ma-control ang jeep.
Gin-athag man sini nga wala siya nakahalin sa front seat sang jeep kag nagakapot lamang siya sa manibela tubtob nga nagbaliskad ang jeep.
Nahibaluan nga ang duha ka mga menor-de-edad nga napatay ang hinablos man sang driver sang jeep.
Una na nga ginpahayag sang hepe sang Leon Municipal Police Station nga napatay ang makina sang jeep rason nga nagdalusdos paidalom ang jeep kag nagbaliskad.
Sa subong, preso ang driver sa Leon Municipal Police Station kag posible magapangatubang sang two counts sang reckless imprudence resulting to homicide kag reckless imprudence resulting to multiple physical injuries.
