𝗜𝗟𝗢𝗜𝗟𝗢 𝗖𝗜𝗧𝗬—Nagpanawagan ang chairman sang Committtee on Health sang Iloilo City Council sa mga kabarangayan sa syudad nga magpanglimpyo sang ila nga ugsaran agud nga malikawan ang dengue nga balatian.
Sa interview sang Bombo Radyo Councilor Alan Zaldivar, chairman sang Committee on Health, iya ginpahayag nga may yara sila sang programa nga may tig-ulo nga “Ugsaran Tinlo-an”, isa ka regular nga mandato sa pagpanglimpyo sang mga kabarangayan kada Sabado nga adlaw sa ila nasakopan nga lugar.
Suno kay Zaldivar, ginakadtuan nila ang mga barangay nga may mataas nga kaso sang dengue agud nga sekyaron kag mahatagan sang mga larvicide agud himuon spray sa palibot kag matapna ang pagdamo sang mga lamok.
Ginpahayag man sini nga nakatalana nga magpatuman ang komitiba sang pagsinapol agud matutokan ang nagataas nga kaso sang dengue sa syudad.
Nahibaluan nga masobra 13% nga nagsaka ang mga kaso sang dengue kon ikumpara sang nagligad nga tuig.
Kon magapadayon naman ang pagsaka sang cases, posible liwat nga ipatuman ang sang syudad ang city wide clean up drive.
Lakip naman sa mga may mataas nga kaso sang dengue sa Iloilo City amo ang Sooc, Arevalo, Sambag sa Jaro, kag Calaparan sa distrito sang Arevalo, Iloilo City.
