𝗜𝗟𝗢𝗜𝗟𝗢 𝗖𝗜𝗧𝗬—Magalunsar sang signature campaign ang pila ka mga transport groups sa Western Visayas agud magtipon sang 10,000 ka mga pirma nga nagapamatok sa Public Transport Modernization Program (PTMP) sang gobyerno.
Sa interview sang Bombo Radyo kay Mr. Elmer Forro, Lead Convenor sang No To PUV Phaseout Coalition, iya ginpahayag nga target sang kooperatiba nga magpapirma sa mga operators, drivers, kag komyuter sa syudad kag probinsya sang Iloilo kag pila ka bahin sang rehiyon.
Suno kay Forro, kon malab-ot ang target, plano ini nga ipadala sa nagkalain-lain nga ahensya sang gobyerno kaangay sang Department of Transportaion (DOTr), Land Transportation Franchising and Regulatory Board (LTFRB), senado, kag lakip na ang Malacañang.
Ginpahayag man sini nga ang tikang ang isa ka palaagyan agud nga mapakita sa gobyerno nga indi gamay ang mga nagapamatok sa programa, kon sa diin, nagapati ini nga 80% sa rehiyon ang indi magpasugot sa ginaduso nga modernisasyon.
Nagapati man ang natungdan nga malab-ot sang kooperatiba ng ginaduso nga signature campaign sa sulod sang isa ka bulan.
Magasugod sang pagpanagtag sang papel ang pila ka mga kooperatiba sa Agosto 16 agud nga umpisahan na ang paglibot kag pagpapirma nga ginalauman matapos sa masunod nga bulan.
