Ginpaidalom naman sa state of calamity ang banwa sang Tigbauan sa probinsya sang Iloilo bangud sa outbreak sang kaso sang dengue.
Sa latest data halin sa Municipal Health Office, yara na sa 117 cases sang dengue ang na-rekord sa amo nga banwa halin sang Enero 1 tubtub sang Agusto 10 nga may 550% nga saka ipaanggid sa 18 gid lamang ka kaso sang nagligad nga tuig.
Gin-report man ang clustering sang kaso sa pito ka mga barangay nga amo ang Brgy. Baguingin, Brgy. Buyu-an, Brgy. Dorong-an, Brgy. Bitas, Brgy. 3 Poblacion, Brgy. 2 Poblacion, kag Brgy. Napnapan Norte.
Ang Tigbauan amo ang ikaduha nga banwa sa probinsya nga nagdeklarar sang state of calamity kasunod man sang lihok sang Passi City nga amo ang pinakamataas sa numero sang kaso sa Iloilo Province.
Matandaan nga sa latest report sang Iloilo Provincial Health Office sa 32nd morbidity week, nagsaka naman sa 4,595 ang mga kaso sa bilog nga Iloilo kag may 10 na nga mga napatay.#
