Ginsulit ni Defense Secretary Gilberto Teodoro Jr. nga nagapabilin ang commitment sang Pilipinas nga magbakal sang multi-role fighter jets kasunod sang pagpang-harass sang China sa kahawaan sa West Philippine Sea.
Suno kay Teodoro, kabahin ini sang pagpabaskog pa sa air defense system sang pungsod.
Ginhimo niya ini nga pahayag kadungan sang welcome ceremony para sa Philippine Air Force (PAF) contingent nga nagpasakop sa Pitch Black Exercise sa Darwin, Australia nga amo ang una nga involvement sang Pilipinas sa multinational exercise gamit ang aircraft kag mga personnel.
Nagtambong sa event sanday Ambassador of Australia to the Philippines Hae Kyong Yu, Armed Forces of the Philippines Chief of Staff General Romeo Brawner Jr., PAF Commanding General Lt. Gen. Stephen Parreño, kag iban pa nga senior officials.
Matandaan na duha ka Chinese fighter jets ang naghimo sang delikado nga aktwasyon sa alagyan mismo sang PAF aircraft sang nagligad nga Huwebes samtang nagapatigayon ini sang patrol operations sa airspace sa Panatag (Scarborough) Shoal.
Ginkondena sang militar kag gintawag nga iligal ang ginhimo sang Chinese aircraft ilabi na bangud sulod ang airspace sa exclusive economic zone (EEZ) sang Pilipinas.
Maswerte nga wala sang personnel nga napilasan kadungan ang insidente apang nag-file gihapon ang Department of Foreign Affairs (DFA)sang diplomatic protest.
