Ginalantaw sang Philippine Army nga may matabo pa gid nga engkwentro batok sa rebelde nga grupo sa Iloilo sa masunod nga mga inadlaw.
Sa interview sang Bombo Radyo kay Lt. Col. J-Jay Javines, spokesperson sang 3rd Infantry Division, iya ginpahayag nga kabahin pa ini sang pag-follow up sang militar kasunod man sang asud-asud nga engkwentro sa Calinog kag Lambunao.
Suno kay Javines, yara subong sa Philippine Army ang momentum bangud nakibon na nila ang mga rebelde, nagutom na ang mga ini, kag nabuhinan na ang pwersa bangud may nagkalamatay sa ila bahin kag nakumpiskaran pa sang mga armas.
“We are looking up to series of encounters in the next few days,” suno kay Javines.
Ginsulit man sini ang mapag-on nga statement ni Brig. Gen. Michael Samson, commanding officer sang 301st Infantry Brigade sang 3rd Infantry Division: “We will run up to the last man standing dira sa NPA sa kabukiran.”
Tapuson suno kay Javines ang problema sa local communist armed conflict paagi sa sini nga mga operasyon magluwas lang kun magsungka mismo ang rebelde.
“Nagutom na sila, nakapoy na sila. Nakibon na naton sila sa ibabaw. Wala na sila sang pakadtuan. The momentum is on our side so dapat i-take advantage naton ini para maubos naton sila… unless mag-decide sila mag-surrender,” pahayag ni Javines.
Matandaan nga sang damlag lang, lima ka myembro sang NPA ang napatay sa asud-asud nga engkwentro sa Calinog.
Kaina sang hapon, naka-engkwentro man sang Army ang Regional Headquarters (RHQ) kag Central Front, Komiteng Rehiyon-Panay (CF, KR-P).
Isa man ka bangkay sang ginapahayag high-ranking leader sang NPA ang nasapwan sa lugar nga ginapatihan napilasan sa engkwentro sang nagligad nga semana.#
(STORY: Philippine Army Spearhead Troopers)
