ILOILO CITY – Nagpaandam ang mga doctor sa publiko nga likawan ang self-medication ilabi na kun may sintomas sang dengue.
Ini ang sa tunga man sang nagataas nga kaso sang dengue sa Iloilo City sa diin lapaw na ini sa alert threshold.
Sa interview sang Bombo Radyo kay Dr. Jan Reygine Hortinela, Medical Officer sang Iloilo City Health Office, iya ginpahayag nga wala sang partikular nga bulong para sa dengue bangud ang “dengue fever” ang tuga sang virus gani indi epektibo ang antibiotics para matapna ang infection.
Suno kay Hortinela, nagakadapat man nga mag-inom sang mga bulong kag vitamins nga aprubado sang doctor agud malikawan ang anuman nga komplikasyon.
Gin-athag man sini nga wala ginarekomendar ang pag-inom sang tawa-tawa agud mabulong ang dengue.
Ginpanugyan man sini sa mga pasyente nga mag-angkon snag bastante nga pahuway kag insakto nga pagkaon agud magbaskog ang resistensya kag mabatuan ang balatian.
