𝗡𝗘𝗪 𝗟𝗨𝗖𝗘𝗡𝗔, 𝗜𝗟𝗢𝗜𝗟𝗢— Pilas kag bukol ang naangkon sang isa ka lalaki matapos nga nag-meet up sa isa ka ginapahayag commercial sex worker nga babaye sa isa ka patyo sa Brgy. Balabag, New Lucena, Iloilo.
Ang biktima amo si alyas Jerson, 27-anyos, may asawa, kag residente sang Brgy. San Julian, Badiangan, Iloilo.
Sa interview sang Bombo Radyo kay Police Lieutenant Noemi Ibuyan, Deputy Chief of Police sang New Lucena Municipal Police Station, iya ginpahayag nga nagtanyag sang extra service ang babaye sa biktima paagi sa transakyon sa text message kag nahilisugot nga magpadulong sa New Lucena Public Cemetery.
Suno kay Ibuyan, gamit ang motorsiklo, nagpadulong ang biktima kag ang babaye sa patyo, apang, pag-abot sang duha sa lugar, ginbalabagan sila sang tatlo ka mga lalaki kag ginpulihan sumbag ang biktima.
Gintumod man sini nga sang nakatyempo ang biktima, dali-dali ini nga nagpalagyo agud nga magpangayo sang bulig, samtang ang babaye ang nabilin sa patyo.
Gintul-id man sang pulis nga dako ang posibilidad nga magkaupod ang mga suspek kag ang ginapahayag nga commercial sex worker nga babaye.
Gindala naman sa pinakamalapit nga ospital ang biktima agud nga lapatan sang nagakaigo nga pagbulong.
Padayon pa nga ginaimbestigaran sang kapulisan ang insidente agud nga matumod ang identity sang mga suspek.
