𝗜𝗟𝗢𝗜𝗟𝗢 —Ginkumpirma sang 3rd Infantry Division sang Philippine Army nga napatay ang tatlo ka mga high-ranking leaders sang Communist Terrorist Group (CTG) matapos nagluntad ang engkwentro sa tunga sang katapo sang gobyerno kag Regional Headquarters (RHQ) and Central Front, Komiteng Rehiyon-Panay (CF, KR-P) sa Brgy. Cabatangan, Lambunao, Iloilo sang Huwebes, Agosto 15, 2024.
Matapos ang engkwentro, ang mga napatay nga rebelde amo sanday:
- Vicente Hinojales, kilala man sa ngalan nga Arjie/ Hadjie/LJ, isa ka mataas nga lider sang New People’s Army, nga naghalin sa Matalam, North Cotabato, kag nagaserbe bilang Regional Secretary sang Komiteng Rehiyon-Panay.
- Maria Concepcion Araneta Bocala, kilala man sa ngalan nga Concha, 1st Deputy Secretary, KR-P, kag NDF Consultant nga naghalin sa Brgy. Pueblo, Concepcion, Manduriao, Iloilo City.
- Vivian Torato Teodosio, kilala sa ngalan nga Minerva/Mara/Moray, Secretary of Central Front, KR-Panay, residente sang Rodriguez St., Sta. Barbara, Iloilo.
Sa interview sang Bombo Radyo kay Lt. Col. J-jay Javines, Chief, 3rd Division Public Affairs Office, iya ginpahayag nga matapos nga nadiskobre ang una nga bangkay sang rebelde, padayon nga nagalibot ang tropa sa lugar kon sa diin, nasugata nila ang 10 ka CPP-NPA Terrorist (CNTs), nga nagresulta man sa duha ka mga napatay nga rebelde rason nga ginbilin sang ila mga kaupod.
Nakuha man sang mga militar ang lima ka high-powered firearms, lakip ang tatlo ka M16 Rifles, isa ka M79 grenade launcher, kag isa ka Visor, upod ang isa ka shotgun kag nagkalain-lain nga war material, personal nga mga pagkabutang kag subersibo nga mga dokumento.
