Ginpasakaan sang kaso nga reckless imprudence resulting to homicide ang driver sang van sang Barotac Viejo Local Government Unit matapos nabungguan ang isa ka Lola nga nagatabok sa pedestrian lane sa Barangay Pagdugue, Dumangas, Iloilo.
Ang biktima amo si Lucy Hortillosa, 71, residente sang Barangay Tabucan, Barotac Nuevo, samtang ang driver naman sang van amo si Rino Cerbas, 45, residente sang Barangay San Roque, Barotac Viejo kag empleyado man sang local government sa amo nga banwa.
Sa interview sang Bombo Radyo kay Police Staff Sergeant John Mark Tuazon, imbestigador sang Dumangas Municipal Police Station, iya ginpahayag nga bag-o lang gid nakaguwa ang biktima sa building sang Iloilo Electric Cooperative (ILECO) II bangud nagbayad ini sang bill sa kuryente.
Nagtabok ini agud magbantay sang salakyan pauli na sa ila nga balay apang ginapahayag nga madasig ang pagpadalagan sang van rason nga nabungguan gid ang biktima.
Ginhingagaw dala ang Lola sa ospital apang gindeklarar ini nga dead on arrival.
