𝗜𝗟𝗢𝗜𝗟𝗢 𝗖𝗜𝗧𝗬 — —Naglab-ot sa apat ka tonelada nga basura ang natipon sang Iloilo City General Services Office (GSO) sa una nga adlaw sang Calle Real Street Night Market sa Iloilo City Proper.
Sa interview sang Bombo Radyo kay Engineer Niel Ravena, head sang General Services Office (GSO), iya ginpahayag nga matapos ginpatigayon ang una nga adlaw sang Calle Real Street Night Market kagab-i, natapos ini sang alas-12:00 sang kaagahon.
Suno kay Ravena, alas-6:00 na sa aga sang natapos ang pagpaninlo sang ila nga katapo sa mga dalan nga nasakopan sang kahiwatan kagab-i.
Ginaekspektar man sini nga mas madamo pagid ang magapadulong sa Dominggo nga adlaw bangud wala sang klase kag tigpalahuway sang mga tawo.
Ginalauman man ang mas madamo nga basura ang makuha sa weekends.
Masobra 20 naman ka waste bins ang ginpangbutang sa lugar, apat ka mga portalet, kag nakigsapol man sa mga kiosk owners nga mag-provide sang garbage bags agud nga masigurado nga matipon ang mga basura.
Nagpanugyan man ang natungdan sa publiko nga likawan ang paghaboy sang basura kag oberbahan ang CLAY GO ukon clean as you go.
Nagpanawagan man sa mga tumalambong nga halongan man ang mga tanom nga yara sa Sun Burst Park agud indi ini maguba.
Nahibaluan nga ang Calle Real Street Night Market ang nagsugod kahapon nga adlaw Agosto 16, kag magapadayon subong Agosto 17, tubtob buwas nga adlaw Agosto 18.
Samtang magasugod naman liwat sa masunod nga semana sa Agosto 23, 24, tubob Agosto 25, 2024.
