𝗜𝗟𝗢𝗜𝗟𝗢 —Naglab-ot na sa 84,323 heads ang swine inventory sa Iloilo ang nabalhag sang Iloilo Provincial Veterinarian’s Office (PVO).
Sa interview sang Bombo Radyo kay Iloilo Governor Arthur Defensor, Jr., iya ginpahayag nga ang gobyerno probinsyal ang nag-alokar sang P4.28 million nga bulig pinansyal sa 357 ka mga mangunguma sa anum ka mga munisipyo, agud nga mapondohan ang mga programa sang sentinel agud mapapas ang presensya sang African swine fever sa ila mga lugar.
Suno kay Defensor, lakip ang banwa sang Barotac Viejo, New Lucena, Dingle, Banate, Santa Barbara, kag San Miguel sa nakabaton sang pondo agud nga ipanghatag sa mga gindesignar nga mga mangunguma.
Apisar sang inventory sang baboy nga nagtaas sang 12,003 ka ulo halin sang Enero, nagpasalig si Defensor nga mangin bastante ang suplay sang mga produkto sang baboy para sa palaabuton nga panahon sang bakasyon.
Sa 28 ka mga local government units (LGUs) nga apektado sang ASF, 17 ang gin-upgrade sa pink ukon buffer zones, sa diin ginapahanugutan ang mga sentinel programs.
Nagapabilin sa red ukon infected zone ang nabilin nga 11 ka mga local government units. Ang pinakaulihi nga narekord nga kaso sang ASF sa Iloilo ang natabo sa San Joaquin, sa diin 52 ka mga baboy ang apektado.
Ginkumpirmar man ni Governor Defensor nga nagapabilin nga epektibo ang pagdumili sa pagsulod sang pork kag pork by-products gikan sa pila ka mga lugar sa pungsod bangud sa pagbalik sang kaso sang ASF.
Nahibaluan nga sa latest nga inventory sang baboy sang probinsya, nagapakita nga ang Iloilo 70.03% nga self-sufficient sa produksyon sang baboy.
