Ginaplano sang Bureau of Animal Industry (BAI) nga pabaskugon ang border controls sa Metro Manila kag malapit nga mga probinsya agud malikawan ang dugang nga paglapta sang African Swine Fever (ASF).
Bag-o lang man nagbutang sang meat inspection checkpoint ang ahensya nga yara sa idalum sang Department of Agriculture (DA) sa San Jose Del Monte, Bulacan agud malikawan nga makalab-ot sa naaminhan nga mga probinsya ang mga baboy nga natapikan halin sa nabagatnan nga naga-repopulate sang ila mga kasapatan.
Ang lokal nga gobyerno nagabulig sa amo nga inisyatibo paagi sa pagdeploy sang dugang nga manpower, kasunod sang pagbalhag sang San Jose Del Monte sang ila una nga kaso sang ASF sa isa sang mga ihawan sini.
Sa subong, naga-coordinate man ang Bureau of Animal Industry sa Probinsya sang Rizal agud makabutang ini sang isa pa ka checkpoint, partikular sa banwa sang Rodriguez.
Samtang, may yara na karon sang anum ka meat inspection checkpoints sa bug-os nga National Capital Region (NCR) agud masiguro nga wala sang ASF ang mga baboy nga ginadul-ong sa mga slaughterhouse kag sa mga merkado.
Apang pagkatapos nga ma-assess ang ila mga operasyon sining nagligad nga apat ka adlaw, ginpahayag sang BAI nga kinahanglan na sini nga magpangayo sang bulig sa Metropolitan Manila Development Authority kag local traffic enforcers.
