Nag-file sang formal protest ang China bangud sa malawig nga presensya sang barko sang Philippine Coast Guard (PCG) nga BRP Teresa Magbanua sa Escoda Shoal.
Ang Escoda Shoal ukon kilala man nga Sabina Shoal amo ang coral reef formation nga nahamtang 70 nautical miles halin sa mainland sang Palawan kag maathag nga sulod pa sa exclusive economic zone (EEZ) sang Pilipinas.
Suno kay Chinese Foreign Ministry spokesperson Lin Jian, nag-protesta sila sa diplomatic nga paagi kag naghingyo sa Pilipinas nga untaton na ang “infringement activities” kag kuhaon na ang amo nga barko nga yara sa lugar.
Ginsiling man sang opisyal nga nakabaton sila sang impormasyon nga may plano ang Pilipinas nga magpadala sang isa pa gid ka barko agud updan ang BRP Teresa Magbanua sa “joint anchoring”. Ginalantaw ini sang China nga isa ka tuyo agud magtukod sang “forward deployment base” sa porma sang “semi-permanent floating platform.”
Ginpahayag sang Chinese official nga gina-monitor nila ang mga development kag indi sila mag-alang-alang sa paghimo sang mga tikang agud nga pangapinan ang ila nga soberanya sa teritoryo kag “maritime rights and interests.”
Sa statement naman ni PCG spokesperson for the West Philippine Sea Commodore Jay Tarriela, ginpahayag sini nga wala sang basehan ang ginpanghambal sang China bangud ang deployment sang Pilipinas sang barko sa Escoda Shoal ang makabig nga legal kag suportado sang United Nations Convention on the Law of the Sea.
Matandaan nga sang tunga-tunga sang Abril sang ginpadala sang Pilipinas ang BRP Teresa Magbanua sa Escoda Shoal agud magbantay bangud ginaalegar may tuyo ang China nga i-reclaim ang amo nga lugar sa West Philippine Sea.
Ini na nga vessel ang nagalaba sang 97-metros kag amo ang pinakamahal kag isa sa pinakadaku nga barko sang PCG.
Suno pa kay Tarriela, ang mga ginasuspetsahan sang China sa ginapanghimo sang Pilipinas ang nag-ugat sa ila mismo kaugalingon nga paagi kun paano sila iligal nga mag-okupar sang maritime areas sa West Philippine Sea nga ginalakipan pa sang illegal reclamation kag provocative militarization.
