Masobra isa ka semana pa lang halin sang nagtakop ang Paris Olympics, apang natalana nga magkit-anay liwat ang Pinoy pole vault star nga si Ernest John “EJ” Obiena kag ang iya mga nakasumpong sa Summer Games lakip na ang world number one kag reigning gold medalist nga si Armand “Mondo” Duplantis sang Sweden.
Base sa nabalhag sa tournament website sang Lausanne leg sang Diamond League, matabo ang kumpetisyon sa Mierkules kun sa diin magluwas kay Duplantis, yara man ang Paris silver medalist nga si Sam Kendricks sang USA kag ang bronze medalist nga si Emmanouil Karalis sang Greece.
Ginabantayan man ang Olympic finalists nga sanday Kurtis Marschall (Australia) kag Sondre Guttormsen (Netherlands) kag ang iban pa nga nagapanguna nga vaulters sa kalibutan kaangay kanday Christopher Nilsen kag Jacob Wooten sang USA, Renaud Lavillenie kag Thibaut Collet sang France, kag ang tumandok sang Switzerland nga si Valentin Imsand.
Matandaan nga nagkabos nga makakuha sang medalya si Obiena sa iya ikaduha nga appearance sa Olympiada matapos nagpang-apat sa finals sa Stade de France.
Nagpauli ini sa Pilipinas sang makadali makaligad ang kumpetisyon kag lakip sa iya ginkadtuan amo ang reception sa Malacañan Palace, ang homecoming sa Chiang Kai Shek College, kag Manila City Hall kun sa diin ini nagbaton ini sang cash incentive.
Wala na ini nakaupod sa heroes’ parade sang Olympians bangud nagpreparar ini sa pagbalik sa Italya para sa panibag-o nga training para sa palaabuton nga kumpetisyon.
Kasunod sang fourth-place finish sa Paris, nag-us-os ang 28-anyos nga Tondo, Manila pride sa ika-numero 3 sa world rankins sandig sa World Athletics. Antes ang Olympiada, nagapangaduha ini kay Duplantis sa amo man nga ranking.#
