Gin-anunsyo sang Algeria nga magabulig ini sa pagsuplay sang fuel para sa power plants sa Lebanon samtang ilabi pa nga nagasingki ang away sang Lebanese paramilitary group nga Hezbollah batok sa militar sang Israel.
Suno sa Algerian Ministry of Foreign Affairs, mismo si President Abdelmadjid Tebboune ang nagmandu sini para liwat nga maka-operate ang power generation stations kag mabalik ang suplay sang kuryente sa ila kaalyado nga pungsod.
Una na nga ginpahayag sang state electricity company sa Lebanon nga nahubsan na sang fuel reserve ang katapusan sini nga operational power plant.
Pahayag sang kumpaniya, ini nga sitwasyon ang magaapekto pati sa importante nga mga pasilidad kaangay sang airport, pantalan, water pumps, sewage systems, kag mga presuhan.
Nag-abiso naman ang south Lebanon Water Corporation sa mga tawo nga magkinot gid sa tubig bangud apektado man sang blackout ang ila abilidad nga mag-pump sang tubig nga kinahanglanon sang mga pumuluyo.
Ini nga anunsyo sa total blackout ang nagguwa halos kadungan man sang kumpirmasyon sang Lebanese Health Ministry nga ang air strike sang Israel sa southern Lebanon ang nagpatay sa 10 ka Syrians kag gin-report man sang military sang Kyiv nga gin-igu sini ang weapons stores sang Hezbollah movement.
