𝗜𝗟𝗢𝗜𝗟𝗢 𝗖𝗜𝗧𝗬 —Tuyo nga ipalab-ot sa Department of the Interior and Local Government (DILG) ang reklamo sang isa ka residente batok sa isa ka barangay kagawad sang Brgy. Baldoza, Lapaz, Iloilo City.
Ini kasunod man sang ginapahayag sang residente nga siya ang ginsipa ni Freddie Jarbadan, kagawad sang nasambit nga barangay.
Sa interview sang Bombo Radyo kay Josie Bendanillo, tagreklamo, iya ginpahayag nga tuyo sini nga madula sa pwesto si Jarbadan bangud man si indi manami sini nga nangin akto.
Suno kay Bendanillo, ginalantaw sini nga may kaangtanan ini tanan sa politika bangud man sa kilala nga supporter ni Iloilo City Mayor Jerry Treñas ang ginareklamo nga kagawad.
Gin-ako man ni Bendanillo nga siya ang anay job hire sang city government, apang gin-terminate bangud sa ginapahayag nga ginadayaw-dayaw sini si Iloilo City Lone District Representative Julienne “Jam-jam” Baronda.
Gin-athag man sini nga gindayaw lamang niya si Baronda bangud bilib ini sa mga proyekto sang mamalidha sa ila nga lugar.
Gintawag man sang natungdan nga “sipsip” kay Treñas ang mga tawo nga nangin rason sang iya nga termination.
Nahibaluan nga bulan sang Mayo sang gin-terminate si Bendanillo, kapareho man nga bulan sang nagpalab-ot sang bulig sa iya si Baronda bangud wala sang nangin solusyon nga ginhatag ang administrasyon.
Ini man ang nangin rason suno kay Bendanillo kon ngaa nagbaylo na lang siya sang iya nga ginasuportahan.
Ginpakalain man sini si Jarbadan bangud nagapati siya nga bilang isa ka kagawad kag public servant, nagakadapat nga mangin professional kag neutral bangud ginadala sini ang mga pumuluyo.
Sa pagpakig-angot naman sang Bombo Radyo Iloilo sa pamilya sang ginareklamo nga barangay kagawad, “no comment” ang ila nangin sabat.
